Fiets vakantie Evert en Martha 6 Mei 2008
Evert en ik bunt van plan um op fietsvakantie te gaone, en in oaverleg met mekare word dit de elfstedentocht in Friesland. Eerst moj uutzeuken hoe doet wie dat, wie hebt daor van pension naor pension efietst koffers wodden veur ons met een auto naor dat hotel hen ebrach waor wie die nacht zollen slaopen. Wie hebt die reis via een advertentie uut de krante geboekt bie een reisburoo, en die verzorgd het vervoer van onze koffers van hotel naor hotel. Den verzorgd bienao alles… Maor eerst in huus de fietsen veur een goeie beurte naor onze plaatselijke fietsemaker brengen, juust Slotboom is de name. Evert’s fietse hef de laatste tied een betjen een zachte achterband, ok izze al is eplakt dus gin beste band meer. Bie de fietsenmaker kommen zeg Evert tegen een van de jonges die daor warkt, ik wil op mien achterwiel graag een antiplofband, den jongen kik um an, en begint te greulen, wat wil ie hebben, een antiplofband, een band die nit lek wod dat heet een anti lekband , zeg den jonge, nou die wil ik er op, ik mot gin lekke band onderweg kriegen. Zo hebt ze onze fietsen netjes in orde emaakt. Wie bunt naor Friesland gereden met de auto, fietsen achterop de fietsdrager, klére in de koffer, alles in de kofferruumte van de auto, d’r geet héél wat met.
Oavere kommen, koffers op de kamer ezet, het was mooi waer. Meteen maor gaon fietsen. Wie zatten dichte bie ’t Iesselmeer en daor waarn jongeren an ’t skydriven, dat is een plank waorop een groot zeil is vastemaakt daor gaot ze op staon en dan laot ze zich deur de harde wind op ’t water aover ’t water soezen en dan ok nog zo hoog meugelijk in de loch springen…..Maor zo wied wazze wie nog nit. Zo’n twintig minuten ongevaer geniete wie van de vakantie, lekker een wekke niks done, de stemming is opperbest, dan opens zeg Evert héél veurzichtig, Martha….Martha ik geleuf dat mien achterband leug lup, héél veurzichtig kiek ik Evert an, en dan kiek ik naor zien achterband, plat, leug, lek. Evert zeg niks, maor ik kan zien dat hé inwendig kokt van woede. Een anti plofband, 45 euro, d’r zit niks anders op stoppen en plakken, d’r zat een kopspieker in. An de kante van de weg, fietse op de kop, buuten band eraf, en wie ziet dat er een kopspiekertje in zit, ja dan krieg ie ok wel een lekke band, ’t deuske met plakspul epakt, de band geplakt, ’t ging veurspoedig, gelukkig maor. Ik wet zeker dat als onze plaatselijke fietsemaker in de buurte was ewes, dat hé ’t nit aoverlaefd had. Verder heb wie gin last maer ehad van kapotte fietsen, ’t was een prachtige fiets vakantie, mooi waer, fijne slaopplaatsen en lekker egetten. Friesland is mooi.
Martha