BESSENSAP
Veurdat wiele met vakantie gaot, heb ik de gewoonte um ’t huus een goeie beurte te geven. Stoffen en soppen, kasten een betjen opruumen alles netjes achterlaoten, ’t hult gewoon fijner vakantie als dat in orde is, ok doe ik ’t een betjen veur Marietje onze buurvrouw die de planten ver zorgd en de post keurig in de kökken neerleg. Op de aovend veur dat wie vot gaot stao ik in de kelderkaste en kiek nog is rond of dat wat daor steet in kan blieven staon tut dat wiele weer teruggebunt van de vakantie, mien ogen zeet daor een flesse staon, wat mot daor noe toch in zitten prakkezeer ik mien, ik pak de flesse op, ’t is een plestikken seven up flesse, een betjen an de dikke kante veuln ik.
Waor kump den toch van dan en wat zit daor noe toch in, en dan wet ik ’t weer, ik heb um gekregen veur mien verjaordag van de mooder van mien schoonzunne, een plestic flesse met zelf gemaakte sap van zwarte bessen, ze had ’t goed met mien veurehad, ze wis dat ik dat lekker vond, ‘k was ’t kats vergetten, noe hatte te lange estaone, het sap was gaon gisten!!!!!!!!!!! Nou dat geet ik meteen weg, zo edacht zo edaon, ik gao naor de kökken, zet de flesse in de gutsteen draaien den dop lös, héél ietskes nog maor en wat er toen gebeurn? Ik zal ’t oe verteln, ’t sap spuiten alle kanten uut, als een fontein zo hoge. Dat geluud PPPPPP SSSSSSSS, dat verget ik nooit meer…!
Ik proberen nog rap den dop wear dichtte te draajen maor dat ging nit ’t soezen en broezen d’r uut, de flesse was raps leug. Alles zat onder ‘t rooie sap plafond, ramen, gordienen, muren, kastjes, planten ’t gasfornuus ,alles maor dan ok alles zat onder. Ik kek is um mien hen, ’t huus net schone, morgenvrog bietieds vot en noe dit ‘t huulen stond mie nader als ’t lachen, maor toen worden ik kwaod, helg op den mooder van mien schoonzunne, altied had ze wat bezunders kon ze noe nooit is met een gewoon cadootje ankommen? Mien man kwam is in de kökken kieken, vrug wat is hier toch gebeurd, ik schreeuwen ut uut en verteln um hoe ’t egaone was, en hé zei: Ie hadden de flesse naor buuten motten gooien.
Ja daor had ik nit an edach, altied wet een ander wat ie hadden motten doon. Wie bunt de hele aovend an ’t soppen ewes. Ik heb de hele tied op de schoonmoeder efoeterd, mien man hef mien uut laoten raozen. Hé zei niks, héél verstandig, hé hef héél goed met eholpen alles schoon te kriegen. ’t Is noe al weer een paar jaor geleden dat ’t gebeurt is, maor ik maak alle flessen plastic of glas met zo’n zelfde schroefdop altied buuten lös, want o wee ’t zal is weer gebeurn. Ik heb Marietje zo heet de moeder van mien schoonzunne verteld wat er met het sap gebeurt was, ze vond het jammer ze had er vulle werk an e had um ’t te maken verteln ze, zal best. Ja zo hadden wiele allebeide völle wark ehad met de flesse rooie bessensap.
Deze keer een zelf geschreven verhaal en echt gebeurd. ’t Is mien zelf overkommen.
Geschreven 25 september 2001Martha.