Bie de bakker verhaal 5

Bie de bakker     verhaal  5

Als ze bie de bakker an ’t beschuutbollen bakken waren, dan koj dat buten op de straote al van wieten roeken. Dan fietste ik gauw naor huus en zocht moeder op. Ome Johan hef beschuutbollen, mag ik d’r wat halen, jao heur dat mag, dat naor de bakkerieje, zo zei ome Johan, ha’j ’t al e-rokken, jao dat had ik, dat rok toch zo lekker ’t water liep mien dan al in de mond, veur allemaole éne zei ik, dat was best vulle, ie mosten ze middendeur snieden dan ha’j d’r twee, heé deed d’r altied ééntje tevölle in  hé zeg den is veur oe, umdat ie ze haalt. Nou dat was ’s aovend’s smullen.

Moeder hef ok nog evraogd of ik koekjes met wol brengen zei ik tegen Ome Johan, een half pond lichte koekjes mot ik hebben. Goed zeite, wat is oe moeder waer zuunig zei hé dan, maor dat was ok zo, lichte koekjes koj meer uutdelen in een groot gezin en daor ging ’t mien moeder umme.
Ome Johan en dochter Jootje  hebt mien een keer evraogd of ik daor op een zaoterdag wol kommen helpen, Jootje wol een dag uut. Natuurlijk maor al te graag, héél vrog mos ik beginnen want bakkers bunt vrog, ik bun de héle dag druk ewes, héél völle brood helpen bakken, krentenbrood groot maor ok kleiner. Ok witte bolletjes. ’s Aovend’s toen ik naor huus ging pakte Ome Johan ziene geldtasse en ik kreeg een rijksdaalder veur ’t helpen, nou wat was ik daor blie met, dat was mien eerste verdiende geld, en daorbie kreeg ik ok nog een klein krentenbrood met naor huus. Ie hebt ’t verdiend zei ome Johan. Thuus ekommen waren ze allemaole blie veur mien, ik vertelde van den mooien dag, en van den rijksdaalder. En het krentenbrood hebbe wie samen opegetten.

Martha