Mien vader en moeder lusten geen van beiden stamppot zoerkool, maor mien breurs en zusters en ikke, viefe bie bekare, die atten het graag,
héél graag zelfs, maor umdat vader en moeder het nit lusten, kokte mien moeder het ok nit. Dat deed Opoe dan veur ons.

Opoe woonde schuun tegen aover ons, dus dicht bie. Als Opoe zelf zoerkool at, kokte ze zovulle dat er ok een flinke panne vol stamppot veur ons was.
Maar afijn um bie ’t verhaal te kommen, op een dag tegen ettenstied an vroeg mien moeder: Martha wil ie effen naor Opoe gaon um de panne met zoerkool op te halen dat ette jullie vandage zei ze.
Jao ik gao al zei ik dat was gin straf um zoiets op te meugen halen. Ik huppel naor de aoverkante bie Opoe naor binnen. Opoe ik kom de zoerkool op halen, Opoe lachten naor mien en zei, ’t steed al klaor, beur de deksel maor ens op en kiek of ’t oe wel ansteet en of het genog is. Nou dat deed ik, het zag er alderbastend lekker uut, grote panne vol zoerkool, een flink stuk worst en oe wat zag ik daor?
Een flink stuk gekokt spek, daor was ik jao raozend op, ’t water liep mien al in de mond. Ik heb Opoe bedankt, en toen naor huus opan. Maor al heel rap zat ik mien te bedenken, als ik zo meteen in huus kom, dan mot ik worst en spek delen deur vief dan blif d’r nit völle veur mien eigen oaver. Ik heb niet lange geprakkezeerd, eerlijk gezegd helemaole nit meer.

Bie Opoe veur ’t huus stond een grote bos rododendoronstruken dicht bie mekare en daor zat een groot gat in dat wist ik, daor bun ik met panne en al in gaon zitten en heb mien héél gemuudelijk alle worst en dat grote stuk gekokte spek opegetten. Het was gruwelijk lekker!!

Toen naor huus opan, binnengekommen vrög moeder was de zoerkool nog nit klaor? Ie waren zo lange vot, nee ’t was nog nit klaor zei ik, moeder beurn de deksel is op, kek in de panne, en vroeg, hef Opoe d’r niks bie gedaon? Nee d’r zat niks bie loog ik.
Nou zeg moeder, dan is Opoe waer is aardig zunig ewes vandage. Ik knikte met mien heufd. Of ik den aovend nog zoerkool egetten heb, dat wet ik nit mear, wat ik nog wel wette, dat ik er absoluut tut noe an toe gin minuutje spiet van hebbe ehad, dat ik zo hebberig was, Moeder is er wel achter ekommen hoe dat wet ik nit. Jaoren later as Opoe en ik bie mekaar waren dan worden dit verhaal altied weer naor boaven ehaald en dan hadden wie er samen nog vulle schik van.

Martha